Peb Hmoob Yeej Ib Txwm Paub Tswvntuj Los Ntev Lawm
Tswvntuj, peb Hmoob ib txwm ntseeg hais tias yog thaum tsis muaj kev ncaj ncees rau noob neej ib leej twg lawm, nws muaj cai quaj qaws thov lub ntuj kom pab muab kev ncaj ncees rau nws. Nws muaj cai txhos caug ntua rau hauv pem teb (hauv av) hu ntuj qaws rau saum ntuj thiab piav nws txoj kev ncaj ncees rau lub ntuj, feem ntau yog nws yeej ncaj ncees tiag ces lub ntuj yeej txiav txim li nws tau thov ntawd. Hos yog nws yeej tsis ncaj ncees lam iab liam lwm leej lwm tus xwb, ces ntuj kuj ho yuav khaum (npam) nws li nws cov lus uas nws tau foom rau lwm leej tib yam nkaus li thiab.
Tswvntuj pab peb noob neej xws li, thov ntuj pab cov tub rog, tsev tau fiv yeem ntuj thov kom lub ntuj pov fwm rau ib leej neeg, los sis tsev neeg twg mus kev dab; uas xav kom Tswvntuj pov puag kom lawv mus dawb mus zoo thiab kom rov qab los txog vaj txog tsev kom “tsis txhob muaj hmab khuam tes ntoo khuam taw”. Tsev neeg kom ib leeg txiv neeb mus fiv ib lub yeem ces nws ua li: nws yuav tuav cuaj (9) tswm xyab, xav txheej, thiab ib txiag ntawv, ntaus nruas neeb hu Tswvntuj nrog rau xeeb teb xeeb chaw thiab 4 tug txoov zaj nyob 4 ceg kaum ntuj kom nrog pov fwm kom rov qab los txog vaj txog tsev mam li mam pauj. Thaum tsev neeg los txog dawb huv li hais, tsev neeg ntawd lawv mam li pauj raws li tau teem tseg.
Tseem tshuav ntau yam tshaj nod ntxiv uas yuav muab tham tsis txhij rau hauv no. Tsuas nco ntsoov hwm Tswvntuj thiab cia siab rau Nws. Tswvntuj yeej yuav foom koob hmoov rau koj thiab koj tsev neeg kom tsuas muaj zoo xwb.
Yawm Saub, peb Hmoob ntseeg hais tias Yawm Saub yog leej paub txhua tsav yam, paub txhij paub txhua, paub txog lub neej yav tag los, lub neej yav tom ntej; Yawm Saub yog Tswvntuj leej tub zeeg ob (2) los sis leej tub ntxawg, Yawm Saub yog leej tub nyob ze ntawm Tswvntuj tshaj plaws, nws ua txhua yam li Tswvntuj lus txib lus khaiv, thiab nws thiaj li muaj cai los yug rau hauv lub ntiaj teb los pab noob neej noob tsav, nws muaj ib feem xyuam loj nyob rau hauv ntiaj teb no yog tuav txoj kev ncaj ncees thiab txoj kev zoo rau txhua yam.
Thaum Tswvntuj tshoj tau lub ntiaj teb lawm ces li muab cob rau Yawm Saub ua leej kav; Yawm Saub kav txhua tsav txhua yam nyob rau ntiaj teb no, yog yam twg tsis mloog Yawm Saub hais ces yam ntawd li poob mus rau Ntxwj Nyoog tes, ces thiaj li muaj ib sob lus hais tseg tias, “Tswvntuj saib zoj tsam tu Tswvntuj tub hlob Ntxwj Nyoog siab, xav zoj tsam tu Ntxwj Nyoog plawv, li cob tau lub ntiaj teb rau Ntxwj Nyoog saib, txwv hlo tsis pub rau Ntxwj Nyoog kav; toom twg yog Yawm Saub kav tsis tus, li yog Ntxwj Nyoog tug, toom twg Yawm Saub qhub tsis txhua, li yog Ntxwj Nyoog sua."
Yawm Saub yog lub teeb ci ntsa paug rau ntiaj teb kom noob neej noob tsav thiab txhua tsav yam khwv tau noj tau haus, kom nyob kaj siab lug, tsis muaj kev nyuaj siab ntxov plawv.
Ntiaj teb no yog Tswvntuj yuav kom hloov li cas ces Tswvntuj tso Yawm Saub xaiv Nws 12 leeg tub ntawd ib leeg twg los yug ua neeg mam los qhia noob neej noob tsav kom ua raws mus seem Tswvntuj tau npaj. Yog yam me ces Yawm Saub li qhia los rau cov Saub nyob txhua haiv neeg kom qhia ntiaj teb neeg ua xwb los tau lawm. Hos yog yam yuav kom hloov mus kav li ntawm 100 mus rau 1,000 xyoo ces yuav yog Yawm Saub mam li cia Nws ib leeg tub twg nqis los yug ua neeg li mam qhia paus ntsis, suav daws thiaj li tautaub.
and so forth....
