Toom I: Thaum Thau Tus Qauv Los Thiab Tu Zam Tag/ Qhuab Ke:
Yuav muab tus qauv tu zam tag ces tso nws zoo zoo rau hauv lub hleb tso rau pem plag. Yuav muaj ib leeg noj xwm (Tsheejxwm) hu tsev Xyomcuab los sis tsev neeg los nrog nws sawv ze ntawm tus qauv sab taubhau. Tsoom tub ki yuav los sawv ua tib leej nrog leej Tsheejxwm nyob rau ntawm nws sab xis tig rau tem tus qauv. Tsoom kwv tij, muam pauj yuav los sawv tuaj rau nram leej Tsheejxwm qab los sis yav nraub qaum. Leej Tsheejxwm yuav tuav tus tswmciab thiab qhuab cov lus rau tus qauv hais li nram qab no. Toom no mas Qhuab Ke mus txog rau lub cai suav daws nyob sib tw nrog lub caijnyoog ntuj yuav sib faib sia ua ntej yuav xa tus qauv mus cuag poj cuag yawm xwb. (Muab ua zaj seev suab liv Quab Ke, Txiv Xaiv, Nkauj Sus los sis ua nriav lus hais xwb los tau, nyob ntawm yus txawj.)
1. Nyiam no…ceebsam lus yuav sam rau koj lau... cwjquag (Tus tuag lub npe), nyob li xyoo no ces…tsiv lawm lub niaj phem lawm lub xyoo, niam ntuj tsis nqus tes txiv ntuj nqus taw.
(Hais rau tus uas kho tsis sawv, hos yog ploj tuag los sis lwm yam lawm no ces cia li hais nqi 2 mus lawm yav nrad ntxiv xwb)
Koj ntaj ntsug thiaj tau qaug li yeev, pw li ko tuaj rau tej npoo txaj, koj tub koj ki, koj kwv koj tig ntoj neeb nthuav yaig tuaj rau pem taj, los koj nyob tuaj mus tsis kaj.
Koj ntaj ntsug thiaj tau qaug li zawv, pw li plhuav tuaj rau tej npoo chaw, koj tub koj ki, koj kwv koj tig nrhiav li tshuav kab yeeb mus zoo tshuaj ntws li ntua tuaj rau koj tej mus nruab plawv, los koj ntoj yees nyob tuaj mus tsis sawv.
2. Koj huab lis hlo nyob tuaj mus tsis yoj, koj txoj pa txoj sia thiaj tu sis zoj. Koj mem taw ntoj yees tsis puv raws, koj thiaj tau qaij qaug seev li yeev los mus cuag koj poj koj yawm nyob rau lub ntuj mus kaj chaw.
Koj huab lis hawv nyob tuaj mus tsis tus, koj txoj pa txoj sia thiaj tu sis zus. Koj mem tes ntoj yees tsis puv cev, koj thiaj tau qaij qaug seev li yeev los mus cuag lawm Tswvntuj nyob rau lub ntuj mus kaj teb.
3. Koj poj koj yawm ces yog Tswvntuj leej nyob mus muaj zoo txuj, txawm sawm tis li zoj tuaj mus muaj zoo lub samxeeb, siv nyog lub xyomtom, muaj zoo lub ceeb, siv nyog lub mus zog loj. Nws txam lis zoj tau lub ntuj-iab-oo, com nkaus tau lub yaj-yeeb ceeb toj, yoj yees tshoj li tau lub ntuj, lub teb, lub hnub, lub hli, huab cua, dej nag, nroj tsuag, noob qoob, noob loo, noob neej mus noob tsav los sib koos ntoj, nyob mus ua xeeb keeb voj.
Koj poj koj yawm ces yog Tswvntuj leej nyob mus muaj zoo ci, txawm sawm thav li nkaus tuaj mus muaj zoo lub samxeeb, siv nyog lub xyomtom, muaj zoo lub ceeb, siv nyog lub mus zog nchav. Nws txam lis zoj tau lub huab-ntuj-kag, com nkaus tau lub yaj-yeeb ceeb toj, yojyees tshoj li tau lub ntuj, lub teb, lub hnub, lub hli, huab cua, dej nag, nroj tsuag, noob qoob, noob loo, noob neej mus noob tsav los sib koos pav, vam vus nyob mus ua voj av.
AND SO FORTH...
Toom II: Coj Tus Qauv Mus Cuag Poj Cuag Yawm, Tswvntuj
Leej Tsheejxwm li hu tsev Xyuamcuab los sis tsev neeg los sawv ua ke ua ntej ntawm tus qauv, los sawv tib yam li tau hais los saud, thiab tus tswmciab yuav tsum zes cig ces yuav ntos cov lus nram qab no xa tus qauv mus cuag poj cuag yawm, Tswvntuj, rau lub Ntuj Kaj.
Nws kuj muaj ib feemxyuam yuav ntos txog tus qauv txoj kev mus thov ntaub thov ntawv los thaw jxeeb (thawj thiab) rau lub ntiaj teb no dua. Tsis tag li xwb muaj ib feem xyuam, yuav plov meej lus rau tus qauv kom nws mus ces mus kom tag. Tsev neeg yuav tsis tos nws rov los daws nws lub kauj vab kauj le thiab saib vaj saib tsev ntxiv lawm. (Hais tias Mojkav Sivyis tshooj tab no ces tsis muaj tso plig, ua nyuj dab, thiab npua tai lawm).
1. Hais… ceebsam lus yuav sam rau koj lau...cwjqaug (Tus tuag lub npe), caij yuav tsis ntev, nyoog yuav tsis ntau rau koj lau, koj cwjquag. Thaud, txog koj lub caij los thawj xeeb lis ntsees tuaj rau noob neej nyob rau Yaj ceeb ces koj tuaj tau lawm ib feeb. Tav no ces txog lawm koj lub caij rov sis ntsees mus lawm niaj ib theem.
Ntshe lub nyoog yuav tsis ntau, lub caij yuav tsis ntev rau koj lau, koj cwjquag. Thaud txog koj lub caij los thawj thiab lis ntsees tuaj rau noob neej nyob rau ntej teb ces koj tuaj tau lawm niaj ib nte. Tav no ces txog lawm koj lub nyoog ncaim sis ntsees ces yuav txog koj lub caij rov lawm niaj ib ncua deb.
2. Koj ntawv nyiaj keeb ntawv puaj txwm, koj tsawv lis nkaus qaim li qho tuaj rau koj nruab tshos los mus thawj xeeb. Koj los ua neej nyob raws nraim li koj daim ntaub, raws nkaus li koj daim ntawv li tau teeb. Zaum no koj hais tias koj ua neej tiav koj lub zwm caij nyob, txwm koj lus zwm nyoog ploj, koj yuav los mus si zoj.
Koj ntawv nyiaj keeb ntawv puaj txwm koj tsawv lis ntiag qaim li qho tuaj rau koj nruab tes los mus thawj thiab. Koj los ua neej nyob raws nkaus li koj daim ntawv, puv nkaus li koj daim ntaub tau muab nyab maim cia. Nyiam no koj hais tias koj ua neej nyob txwm nkaus koj lub nyoog pluj, txog ntua koj lub caij mus, koj yuav los sis zus.
3. Koj yuav los mus nrhiav koj poj koj yawm yog lawm Tswvntuj, ces yuav muab koj li cwj huab qag rau koj nqa. Koj yuav txais lis nkaus tau koj tus cwj huab qag tuaj rau koj tej mus qaum npab. Zaum no ces tus cwj huab qag yuav pus lis ntiag koj ya li plo ncaj qha mus cuag koj poj koj yawm nyob rau lawm pug ntxeev Ntuj Kag.
Koj yuav los mus nrhiav lawm Tswvntuj, ces yuav muab koj li cwj huab qag rau koj coj. Koj yuav txais lis nkaus tau koj li cwj huab qag tuaj rau koj tej mus quam tes. Tus cwj huab qag yuav pus lis ntiag koj ya li plo ncaj nraim mus cuag Tswvntuj nyob rau lawm pug ntxeev ntuj saum peg.
AND FOR FORTH.....