Txhooj Tshoob Txij Nkawm

Txhooj tshoob 2 ntawm Hmoob li kab tshoob kev kos yog tshoob nug.  Hmoob li tshoob nug muaj tus yeeb yam xws li:

1.    Thaum niam txiv pom hais tias niam txiv tus tub los tiav txiv zoo muab nyab rau.

2.    Niam txiv pom luag tus ntxhais zoo xws teb xws chaw, xav tau los rau tej tub ua nyab.

3.    Tej tub tej ntxhais yeej muaj txoj kev hlub, xav kom tej niam tej txiv mus nug.

Yeeb vim li ntawd, niam txiv tog tub li yuav tau thov meej koob mus nrog nug luag tus ntxhais.  Tshoob nug thiab tshoob zawj ces ua muaj ntsi yuav zoo sib xws.  Yuav tsis muab ob co txheej txheem los hais rau hauv no yeeb vim nws ntev heev.

Txhooj Tshoob Coj/Tshoob Tog Qws

            Txhooj tshoob 3 yog lawm tshoob coj los sis tshoob tog qws, nkauj pom nraug qab, nraug pom nkauj lw.  Peb Hmoob tej niam tej txiv ua lub neej yuav xaiv poj xaiv nyab rau tej tub, yuav tsum mus ua tshoob phwb thiab tshoob nug xwb.  Peb Hmoob niam Hmoob txiv yeej tsis npaj muaj tshoob coj los sis tshoob tog qws, tshoob zij, tshoob poj ntsuam, thiab tshoob poj nrauj los yog nkauj fa, nrog rau nkauj thim. 

            Nyob los tom qab no, peb Hmoob muaj kev plaub kev ntug ntau yam.  Xws li tej laus niaj txis piv txoj lus hais tias, “Tej laus cib nyeej qas quas tsi, tab sis tej hluas tuav tes luag ntxhwb ntxhi.  Tej laus sib ntxub ua plhu dub quas nciab, tab sis tej hluas kev hlub loj dais ncuv rau nruab siab.”  

            Txhooj tshoob coj nyob tuaj rau ntawm peb Hmoob lub rooj tshoob rooj kos tshwm sim mas yeeb vim yog muaj tej xwm txheej zoo li nram qab no:

1.    Tej tub tej ntxhais sib nyiam, ua nkauj ua nraug sib raug zoo, xav sib qawg ua lub neej.  Tej niam tej txiv muaj kev cib nyeej los ntev niaj ntau xyoo ces tog twg los tsis kam ua tshoob rau tej hluas.  Txawm ib tog kam, ib tog ho tsis kam ces ua rau tej hluas tsis tau sib yuav.

2.    Muaj tej hluas nkauj hluas nraug sib sib hlub uas tseem npaj yuav sib yuav.  Tus ntxhais niam thiab txiv muaj tej txheej ze muaj tub cia li tuaj nqis tsev hais yuam yuav lawm.  Ua rau tej tub tu siab tsis txawj tag.  Thaum zoo li no yog txawm yog tus tub los sis tus ntxhais, tus uas xav txhij ntim txhua ces ua ib siab puam chawj cia muab nkawv zaj vis-rhawv los hais ua dab neeg, kwv txhiaj, thiab lus taum piav ua ntuv zus tseg cia rau tej tub tej ki kawm lawm xwb.  Ho hais txog cov tuj ntxhais hluas uas tsis sib tau yog vim tej hlaus, cov hluas uas kawg tswv yim lawm, los sis xav       tsis  nrog xav, ces cia li mus ua phem rau nws tus-kheej los kuj muaj.

3.    Thaum tej tub ntxhais hluas paub tseeb hais tias tej laus tsis pub sib yuav los sis tej ntxhais niam txiv tej txheeb ze tuaj nqis tsev hais, muaj cov tub ntxhais hluas siab tawv ces cia li sib yaum coj khiav mus sib qawg ua lub neej tsis yuav kwv yuav tij, yuav neej yuav tsav hais li. 

Yeeb vim muaj cov teeb meem li hais tag los saud, thiab tseem muaj ntau tshaj, tshoob tog qws thiaj li muaj tshwm sim rau peb Hmoob siv los lawm. 

            Thaum muaj ob tug hluas nkauj hluas nraug cia li sib coj sib pus mus lawm ntsiag to ces niam thiab txiv ob tog los yuav tsis pom qab ua li cas.  Niam txiv tog tub txawm tsis xav yuav tus ntxhais los tsis zoo xa rov qab, hos niam txiv tog ntxhais tsis nyiam tog tub los tsis xav ua plaub ua ntug.  Ob tog niam txiv ua tsis tau tes ces cia muab Liaj Lwg thiab Rhwv Mis li kab tshoob kev kos txo los kom haum rau tej tub tej ntxhais txoj kev sib qawg ua neej no.

            Yog niam txiv tog ntxhais ho muaj kev chim kev cib nyeej li cas los mam muab coj los hais rau saum lub rooj tshoob rooj kos xwb.  Luag tej laus ua tshoob ua kos li qhub tseg tias, “Ntuag twg, mam ntxiv twg; dub twg, mam ntxhua twg.”  Hais txog qhov no ces yeeb vim yog puaj tiam peb Hmoob yeej tsis tau muaj tej tub ntxhais yuav sib coj kiav mus sib yuav zoo li no.  Yog zoo li no lawm, ces thaum mus ua tshoob, tog tub li raug nplua thiab raug cem heev los tsuas uv kom dhau.  Thaum uv dhau lawm, tshoob kos kuj muaj pib thiab muaj xaus rau ob tug hluas los sib txis ua txij ua nkawm lawm thiab.    

            Tom qab no, tej tub tej ntxhais sib yuav ua rov ua rais, ua rau tej niam txiv tsis pom qab ua plaub tag nrho.  Hmoob txwj Hmoob laus thiaj li hais tseg tias, “Koj qaib pw kuv cooj, kuv os pi koj nkuaj.”  Txawm tog ntxhais niam txiv nplua tog tub lawm niaj ib pob los lwm hnub tog ntxhais niam txiv muaj lawm ib tug tub tuaj nphav txog lawm tog tub niam txiv tus ntxhais ces yeej yuav mag nplua tib yam nkaus, los sis tseem ua phem tshaj ntawd rov qab thiab.  Ua rau tej niam tej txiv thim xav li los ua kom noj nyog nyob nyog kom tsis muaj plaub muaj ntug lawm.

            Thaum tej tub ntxhais coob leej cia li sib nyiam, sib raws, sib coj, lawm ntsiag to.  Qhov no, ua rau tej niam tej txiv cia li los muab Liaj Lwg thiab Rhwv Mis li kab tshoob kev kos kho los ua txhooj tshoob coj los sis tshoob tog qws rau tej tub tej ntxhais tau siv.  Thaum no tej tub ntxhais li muaj zoo lub sam ntxwv los sib xaiv lawv li txij nkawm li siab xav.  Hos tej niam tej txiv li mav mam sib cog coj siv tus txhooj no los txog rau niaj hnub niam no.

Txhooj Tshoob Zij

            Peb Hmoob tej niam tej txiv ua lub neej los mus ntxiv tau ntau niaj mus ntau xyoo nrog txhooj tshoob phwb thiab txhooj tshoob coj.  Tej tub tej ntxhais ua nkuaj ua nraug tau ywj siab.  Txoj kev sib qawg ua lub neej txawm yuav sib yuav los mus nruab hnub hmo ntuj rau tom niam pog txiv yawg tsev los yeej tsis muaj leej twg hais thiab txwv tau li. 

            Nyob tsis tau ntev niaj mus ntau xyoo, ho muaj tau lawm tej tub uas nyiag nyiam luag tej ntxhais dhau heev lawm, tej ntxhais ho tsis nyiam nws.  Tej leej tub no ua tsis tau tes ces cia li haub cov kwv tij mus nyob tom kev tos nyiag zij luag tej ntxhais coj mus ua nyab.  Thaum zoo li no lawm, thiaj li muaj txhooj tshoob zij tawm tuaj rau peb Hmoob poj Hmoob yawm qhib kev tshoob kev kos tshiab.

            Cov yam ntxwv ntawm txhooj tshoob zij yog muaj raws li nram qab no:

1.    Yog vim tus tub los sis niam txiv nyiam tus ntxhais dhau heev lawm, tab sis tus ntxhais tsis nyiam tub tub los sis tsev neeg.  Paub tseeb lawm hais tias txawm niam txiv mus zawj los ntshe yuav yuam tsis tau tus ntxhais yuav tus tub.

2.    Tus tub thiab tus ntxhais sib nyiam hauj sim xwb.  Tus ntxhais mas xav kom tus tub mus nqis tsev hais tab sis tus tub yeej paub lawm hais tias mus zawj los tus ntxhais niam thiab txiv yeej tsis muab rau.

3.    Muaj tej tub nyiag nyiam tus ntxhais dhau heev lawm thiab ntshai tsam ho muaj lwm leej lwm tus tuaj nqis tsev ua ntej lawm.  Tej tub no cia li mus thab kom muab tau ib nyuag qhov puav pheej rau tus ntxhais.  Thaum no ces tej tub thiaj li muaj cai zij tej ntxhais mus ua sev.

4.    Muaj tej nom tej tsw pom luag tej ntxhais loj hlob zoo nkauj xav yuav ua niam yau, ces cia li tab meeg tuaj zij tom tej kev mus ua poj niam lawm.  Thaum rov tuaj hais tshoob, twb tseem tsis pub tus ntxhais niam txiv hais ib los lus phem kiag li thiab.

Rhaws li peb Hmoob tej kab lis kev cai, yog thaum tej tub zij tau tus ntxhais mus muab lwm qaib thiab coj mus rau hauv tsev lawm.  Tej ntxhais yuav rov mus nkag hauv nws niam nws txiv tsev tsis nyog lawm.  Tej no yog peb Hmoob li dab qhuas hlob hlob, yog tus ntxhais rov qab mus tsev ces yuav ua xyob txhiaj rau tsev neeg.  Yog li txawm tus ntxhais nyiam thiab tsis nyiam los yuav tau nrog tus tub thiab tsev neeg nyob kom txog ntua hnub rov mus hais tshoob.  Feem ntau, tus ntxhais los nrog tsev neeg nyob txog thaum mus hais tshoob ces tus ntxhais los kuj swm tus tub thiab tsev neeg lawm.  Tus ntxhais cia li ua ib siab yuav tus tub lawm los kuj muaj.  Hom txij nkawm zoo li no los feem coob yeej mus ua lub neej nto ntsis lawm thiab.

Ntawm txhooj tshoob zij no, muaj tej txhia ntxhais tau txo txoj sia los lawm ntau leej.  Qhov no yeeb vim tej ntxhais tsis nyiam tus tub los sis tsev neeg, nws tsis xav yuav los sis nws twb yeej muaj nws ib tug hluas sib tham zoo zoo swv heev lawm.  Nws ua zaj twg los yuav tsis dim li ces nws yuav tsum tuag xwb thiaj tag nws txoj kev nyuaj siab.  Ho muaj ib txhia ces txawm sib yuav nyob ua ke los yeej sib ntxub mus ntev hli ntev xyoo.  Qee tus ces sib ntxub mus txog ntua hnub sib nrauj kiag los kuj muaj.

            Raws li tej ua niam ua txiv tham qhia tseg mas nyob rau tej lub teb chaw, muaj tej nom tswv txwv kom tsis pub siv kev zij no lawm.  Los tsem muaj tej tsev neeg tsis leem cai tseem zij qees thiab.  Lawv tsuas muab nyiaj txiag mus ntxuav niam txiv, nyab neej nus plhu xwb ces tsis muaj plaub ntug dab tsi.

Txhooj tshoob zij tsis muaj ib tug txheej txheem twg los phua rhe hais tias qhov no yog li no.  Tej niam tej txiv xav kwv xav tij xav txheeb xav ze ces tsuas ua raws li lub teb lub chaw kev tshoob kev kos kom sawv daws nyob taus ua ke.  Yog li no, thaum tej tub zij tau tej ntxhais mus lawm 3 thaig kis rov tuaj ua tshoob ces thiaj li ua raws nkaus li ntshoob coj ciag xwb.

Txhooj Tshoob Poj Ntsuam

            Peb Hmoob lo lus hais tias yawg ntsuag nrog rau poj ntsuam yog hais tias nws twb muaj dua txij nkawm los lawm, tab sis nws tus txij nkawm tau tag sim neej lawm.  Nyob li ntawm tus poj ntsuam, raws li peb Hmoob li kev lis kev cai ib txwm ua los, mas yog thaum nws tus txiv tuag tas, yog muaj cov kwv twg xav qaws no ces luag cia li muab txis rau cov kwv ib tug yuav.  Qhov yuav no yog yuav ua tug kav tug, los sis yuav ua niam yau los yeej tau.  Raws li txoj cai ces tsuas pub txis rau cov kwv xwb.  Txwv tsis pub txis rau cov ua tij, cov lawm txiv, cov lawm tub los puas lawm xeeb ntxwv.

            Yog thaum tus poj ntsuam no nws tus txiv tau tag sim neej uas tsoom niam thiab txiv yuav muab txis rau tej kwv yau ces lawv yuav saib tus poj ntsuam no nruj heev kom tsis muaj lwm tus sab nraud tuaj mus yuav tau.  Los yog tsoom niam thiab txiv yeej yeem rau lwm leej tuaj yuav no ces lawv kuj kav liam ywj nws siab thiab.

            Hais txog keeb kwm ntawm txhooj tshoob poj ntsuam no mas tej poj yawm yeej tsis tau npaj rau sawv daws siv li.  Qhov no yeeb vim noob txheej tshoj thaum ub leej tib neeg tsis muaj poj dab yawg ntsuag ua tshoob ua kos, ces Liaj Lwg yeej tsis xeeb muaj; Rhwv Mis yeej tsis xeeb txawm, poj thiaj rhawv tsis tau kab cia, yawm thiaj rhawv tsis tau kev tseg.  Yog li tus tuaj los thiaj li ua tsis muaj kab muaj ke tuaj; tus nyob los thiaj li ua tsis muaj kab muaj ke tos.  Ib qho ces yog tus poj ntsuam no ntawd txoj kab tshoob kev kos ces luag twb muab ua tas los nram ntej nram ntxov.  Niam txiv yug niam txiv tsuas qua ib zaug xwb.  Yog hnub no niam txiv tus ntxhais mus ua lub neej ib nqag tsis nto ntuj ib nploog tsis nto ntsis los sis tsis xyom huj xyom seem los niam txiv yuav tsis pom qab ua tshoob. 

            Yog li thaum muaj tau ib tug poj ntsuam mus yuav txiv tshiab, nkawv ho yuav sib qaws mus ua lub neej ntsiag to los ho yuav tsis zoo qaws ces cia lam muab ib tug txheej txheem ua mus kom zoo sib qaws ua txij ua nkawm dua tshiab xwb.  Tus txheej txheem no li yog txhooj tshoob poj ntsuam uas tej laus hais tias yog tshoob “niam txais tog txiv txais nta, tsis yog tshoob nkauj txhav qaib nraug txhav noog.”  Tus txheej txheem no yog thaum ua kiag ces ib roog tshoob tsis thooj li ib roog.  Feem ntau tsuas ua ib pluag ntxuag noj kom zoo qaws nkawv los ua txij ua nkawm xwb.  Raws li cov laus ua dua los ces tsuas muaj ib rawg ntxuag los ua noj xwb.  Hos thaum ua noj los tseem noj ntsiag nto twb tsis pub ua suab sab tsam ho nrov ncha rau teb rau chaw thiab.  Qhov no ua rau tej poj dab yawg ntshuag twb tsis pom qab muaj lub siab mus pib lub neej tshiab tag nrho.

Tshoob Poj Nrauj, Nkauj Fa, Nkauj Thim

            Nyob rau ntawm peb Hmoob, lo lus tias poj nrauj yog tus niam tsev uas tau muaj txiv dua lawm.  Tab sis nws tus txiv thiab nws tau ua ib lub neej tsis xyom huj xyom seem, muaj xaiv muaj lus tsis sib haum, ces thiaj li tau sib nrauj plam ntawm txoj kev ua txij ua nkawm.  Raws li tej niam tej txiv tau piav tseg ces ntawm poj nrauj, nkauj fa, thiab nkauj thim ces mas muaj li nram no:

1.    Poj Nrauj thiab Yawg Nrauj: 

Tej poj niam uas mus yuav txiv ua lub neej tsis sib haum xeeb los ntawm kev tsis tab cuab vij zeej, tsis mloog lus, ua neeg lim hiam, tub nkeeg, tub sab, nyiam nrog luag plhoj luag twv los puas nyiam ua plees ua yig, thiab lwm yam.  Los sis tus poj niam yeej ua zoo kawg rau tsev neeg, tsuas tus txiv tsis txim txiaj los pab txhawb lub neej kom tsheej.  Nws thiaj li tsis xav ua lub neej nrog tus txiv, thiaj ua ib siab nrauj mam li mus pib lub neej ntshiab.

2.    Nkauj Fa:

Tej poj niam uas xwb tim tsis nyiam poj yawm los puas tsis nyiam tus txiv.  Nws pheej nrhiav kev ua lim hiam, ua nkauj fa tas zog kom tau dim tsev hmoob ntawd.  Los sis muaj lwm leej lwm tus pha kom nws yuav tsum khiav kom dim.

3.    Nkauj Thim:

Muaj ib hom poj niam uas tej laus hu ua “Nkauj thim”.  Hom no yog cov poj niam uas yuav tus txiv yeeb vim yog raug zij tom tej yas kev yas ncua mus yuav luag.  Los sis nws niam nws txiv yuam nws mus yuav luag xwb.  Nws yeej tsis nyiam tus txiv ntawd kiag li.  Thaum nkawv rov tuaj ua tshoob ces tus ntxhais los sis tus niam ntawd cia li tsis tuaj yeem rov mus yuav tus txiv lawm.  Thaum no tus ntxhais niam thiab txiv los yuav tau thim tej uas tus tub tau siv rov qab rau tog tub.

Cov poj nrauj, nkauj fa, thiab nkauj thim no feem ntau tsis tshua mus txog rau txwj laug hais, thiab thaum thim tag ces tus ntxhais los sis tus niam yuav tsis tshuav nuj nqi dab tsi ntawm tus txiv lawm.  Hais txog tshoob kos uas ho muaj tus tuaj yuav tom qab ntawd, no ces yeej ua muaj ntsis zoo li tshoob poj ntsuam.  Qhov txawv me ntsis yog thaum hais txog ntawm nqi tsoob nqi kos ces ntawm tus nkauj fa thiab tus nkauj thim, niam txiv xav sau li tus nkauj xwb los yeej tau.  Tsuas yog tsis pub muaj cai noj tus npua luam xim lawm.

Txhooj Tshoob Txij Nkawm

             Dhau li ntawd, yeeb vim yog peb Hmoob tsis muaj teb muaj chaw thiab lub teb chaws nyob tsis thaj yeeb, ua lub neej tawg teb tawg chaw.  Zaum no peb Hmoob tau tsiv teb tsaws chaw tuaj nyob rau luag teb luag chaw, xws li teb chaws Asmivkas, Fabkis, Austaslias, Casnasdas, thiab lwm lub teb chaws vam meej.  Peb tej nom tej tsw tsis muaj vaj huam sib luag nrog luag, tej kab lis kev cai thiaj tsis nyob sib thooj.

Thaum muaj tej tub tej ntxhais sib yuav, sawv daws yeej tseem xav siv peb Hmoob li qub txhooj tshoob los mus txis nkawv ua txij ua nkawm.  Tab sis thaum nkawv lub neej muaj kev nyuaj siab, lwj siab, thiab ntxhov plawv tuaj lawm.  Tej cai tshoob kos siv los tsa nkawv lub neej cia li siv tsis tau los pab nrog tswj nkawv lub neej li yav tag los lawm.  Tej kwv tij, neej tsa, thiab tej nom tej tsw los ib tug hais tsis tau ib tug li lawm.  Tsis zoo li lub neeg tag los no uas thaum hais mus txog peb Hmoob tej nom tej tsw yog leej twg tawv ntau nyom cai ces mag hlua pav kiag, ntaus ncaws los tsis muaj leej twg hais tau. 

and so forth...